।। गीतिपूर्वं श्रीगणपतिस्तोत्रम् ।।
सुमुख प्रथम स्वनामगायकपालक सेवकमंगलकारक।कामसुपूरक मंगलकारक, त्राहि विनायक भाविकतारक।।१।।
सिंदूरलेपक मोदकभक्षक, दुर्जनशिक्षक निजजनवीक्षक।अंकुशधारक जगदुद्धारक, लोकविधारक संहारकारक।।२।।
अशेषकारक शक्तिविधारक, मूषकवाहक सुरदरदाहक।कलौ सुतारक त्वं हि विनायक, पालक सेवकमखिलाकहारक।।३।।
करुणारससंपूर्णकटाक्षामलवीक्षणैः।योऽनुगृह्णाति भक्तान्स प्रसन्नः सुमुखः स्मृतः।।४।।
ये परित्यज विहितं निषिद्धं प्रचरन्ति ते।वक्रास्तान्तुण्डत्येष वक्रतुण्डः प्रकीर्तितः।।५।।
प्रथमं मंगलायैव गणेशः स्मर्यते बुधैः।सर्वदेवार्चितत्वात्स गणेशः प्रथमः स्मृतः।।६।।
स्मरणान्निजभक्तानां सर्वविघ्नान्निवार्य यः।कामान् पूरयति क्षिप्रं गणेशः कामपूरकः।।७।।
निवार्यामंगलान्याशु स्मरणाद्गणनायकः। करोति मंगलान्येष ततो मंगलकारकः।।८।।
इंद्रादीनां तु देवानां विविधा नायकाः खलु।न नायको गणेशस्य कोऽप्यतोऽसौ विनायकः।।९।।
।। इति श्री प. प. श्रीवासुदेवानंदसरस्वतीविरचितं गीतिपूर्वं गणपतिस्तोत्रं संपूर्णम् ।।
