।। श्री गजानन बावन्नी ।।
जय जय सद्गुरु गजानना ।
रक्षक तूची भक्तांना ।।१।।
निर्गुण तू परमात्मा तू ।
सगुण रुपात गजानन तू ।।२।।
सदेह तु परि विदेह तू ।
देह असुनी देहातीत तू ।।३।।
माघ वद्य सप्तमी दिनी ।
शेगांवात प्रगटोनी ।।४।।
उष्ट्या पत्रावळी निमीत्त ।
विदेहत्व तव हो प्रकट ।।५।।
बंकटलाला वरी तुझी ।
कृपा जाहली ती साची ।।६।।
गोसाव्याच्या नवसासाठी ।
गांजा घेसी लाऊनी ओठी ।।७।।
तव पदतीर्थे वाचविला ।
जानराव तो भक्त भला ।।८।।
जानकीरामा चिंचवणे ।
नासवूनी स्वरुपी आणणे ।।९।।
मुकीन चंदुचे कानवले ।
खाऊनी कृतार्थ त्या केले ।।१०।।
विहरीमाजी जलविहिना ।
केले देवा जलभरणा ।।११।।
मधमाश्याचे डंख तुवा ।
सहन सुखे केले देवा ।।१२।।
त्यांचे काटे योगबले ।
काढुनि सहजी दाखवले ।।१३।।
कुस्ती हरिशी खेळोनी ।
शक्तीदर्शन घडवोनी ।।१४।।
वेद म्हणूनी दाखवला ।
चकीत द्रवीड ब्राम्हण झाला ।।१५।।
जळत्या पर्यंकावरती ।
ब्रम्हगिरीला ये प्रचिती ।।१६।।
टाकळीकर हरिदासाचा ।
अश्व शांत केला साचा ।।१७।।
बाळकृष्ण बाळापुरचा ।
समर्थ भक्तचि जो होता ।।१८।।
रामदास रुपे त्याला ।
दर्शन देवुनि तोषविला ।।१९।।
सुकलालाची गोमाता ।
द्वाड बहु होती ताता ।।२०।।
कृपा तुझी होताच क्षणी ।
शांत जाहली ती जननी ।।२१।।
घुडे लक्ष्मण शेंगावी ।
येता व्याधी तू निरवी ।।२२।।
दांभिकता परि ती त्याची ।
तू न चालवुनि घे साची ।।२३।।
भास्कर पाटील तव भक्त ।
उद्धरिलासी तूं त्वरीत ।।२४।।
आज्ञा तव शिरसावंद्य ।
काकहि मानती तुज वंद्य ।।२५।।
विहरीमाजी रक्षियला ।
देवा तु गणू जवर्याला ।।२६।।
पिंताबरा करवी लीला ।
वठला आंबा पल्लविला ।।२७।।
सुबुद्धी देशी जोश्याला ।
माफ करी तो दंडाला ।।२८।।
सवडद येथील गंगाभारती ।
थुंकुनि वारली रक्तपिती ।।२९।।
पुंडलिकाचे गंडातर ।
निष्ठा जाणुनि केले दुर ।।३०।।
ओकांरेश्वरी फुटली नौका ।
तारी नर्मदा क्षणात एका ।।३१।।
माधवनाथा समवेत ।
केले भोजन अद्यष्ट ।।३२।।
लोकमान्य त्या टिळकांना ।
प्रसाद तूचि पाठविला ।।३३।।
कवरसुताची कांदा भाकर ।
भक्षिलीस त्या प्रेमाखातर ।।३४।।
नग्न बैसुनि गाडीत ।
लीला दाविली विपरीत ।।३५।।
बायजे चित्ती तव भक्ती ।
पुंडलिकावर विरक्त प्रिती ।।३६।।
बापूना मनी विठ्ठल भक्ती ।
स्वये होशी तु विठ्ठल मुर्ती ।।३७।।
कवठ्याच्या वारकर्याला ।
मरीपासुनी वाचविला ।।३८।।
वासुदेव यति तुज भेटे ।
प्रेमाची ती खूण पटे ।।३९।।
उद्धट झाला हवालदार ।
भस्मिभूत झाले घरदार ।।४०।।
देहांताच्या नंतरही ।
कितीजणा अनुभव येई ।।४१।।
पडत्या मजुरा झेलीयले ।
बघति जन आश्चर्य भले ।।४२।।
अंगावरती खांब पडे ।
स्त्री वाचे आश्चर्य घडे ।।४३।।
गजाननाच्या अद्भुत लिला ।
अनुभव येती आज मितीला ।।४४।।
शरण जाऊनी गजानना ।
दुःख तयाते करी कथना ।।४५।।
कृपा करी तो भक्तांसी ।
धावूनि येतो वेगेसी ।।४६।।
गजाननाची बावन्नी ।
नित्य असावी ध्यानीमनी ।।४७।।
बावन्न गुरवारी नेमे ।
करा पाठ बहुभक्तीने ।।४८।।
विघ्ने सारी पळती दुर ।
सर्व सुखांचा येई पूर ।।४९।।
चिंता सार्या दुर करी ।
संकटातूनि पार करी ।।५०।।
सदाचार रत् सदभक्ता ।
फळ लाभे बघता बघता ।।५१।।
सुरेश बोले जय बोला ।
गजाननाची जय बोला ।।५२।।
जय बोला हो जय बोला
गजाननाची जय बोला
अनंतकोटी ब्रम्ह़ांडनायक महाराजाधीराज योगीराज परब्रम्ह सच्चिदानंद भक्तप्रतीपालक शेगांवनिवासी समर्थ सद्गुरु श्रीगजानन महाराज की जय
जय गजानन जय गजानन
